27, 28 і 29 сакавіка ў Інстытуце тэалогіі Беларускага дзяржаўнага ўніверсітэта прайшлі выніковыя пасяджэнні рэспубліканскага конкурса навуковых работ і сачыненняў вучняў ліцэяў, гімназій, агульнаадукацыйных школ «Біблейскія сюжэты ў сусветным мастацтве».

Да гэтага конкурса вучні рыхтаваліся амаль цэлы навучальны год: збіралі матэрыял, шукалі натхненне, упарта працавалі і пасылалі свае работы ў Інстытут. З 956 прац журы адабралі лепшыя і запрасілі іх выканаўцаў у фінал. Туды трапілі і дзяўчаты з Салігорска і Салігорскага раёна: Ангеліна Лахвіч (ДУА «Чапялёўскі УПК ДСБШ Салігорскага раёна»), Елізавета Цітова (ДУА «СШ № 5 г. Салігорска»), Кацярына Гарэлава (ДУА «СШ № 11 г. Салігорска»), Марына Бойка (ДУА «Вялічкавіцкая сярэдняя школа Салігорскага раёна»), Юлія Новікава (ДУА «Гімназія № 2 г. Салігорска») і я, Марына Яраховіч (ДУА «Старобінская сярэдняя школа Салігорскага раёна»). Было вельмі прыемна атрымаць ліст ад старшыні журы конкурса, першага праектара інстытута Серафіма, епіскапа Бабруйскага и Быхаўскага. Мяне запрасілі на трэці дзень падвядзення вынікаў, 29 сакавіка.

Калі я прыехала, то вельмі хвалявалася, але ўбачыўшы, што ўсіх удзельнікаў на ўваходзе сустракаюць студэнты Інстытута са шчырымі ўсмешкамі, я адчула сябе больш упэўненай. Усіх удзельнікаў запрасілі ў невялічкую, але ўтульную актавую залу. Пачалося ўзнагароджанне. Кожнаму ўдзельніку, акрамя дыплома, падарылі кнігу «Российская Империя в цвете 1909-1915» ад выдавецтва Беларускага экзархата. Першымі ўзнагароджваліся ўдзельнікі, якія не занялі высокага месца, але тым не менш напісалі добрыя цікавыя работы. Іх чакалі лісты падзякі ад Інстытута тэалогіі БДУ. Мая работа была лепшай. Я заняла першае месца.

Пасля заканчэння ўрачыстай часткі мерапрыемства мы наведалі кафедральны Свята-Духавы сабор, дзе архімандрыт Аляксей распавёў нам пра чысціню хрысціянства, пра мінулае і сучаснасць.

Пасля цікавай лекцыі Аляксея мы накіраваліся на экскурсію ў Нацыянальны мастацкі музей Рэспублікі Беларусь, дзе змаглі не толькі палюбавацца прыгажосцю твораў мастацтва, а і паслухаць спевы. Так, менавіта спевы! Бо спецыяльна для нас у музей прыехала група «Благовест» і выканала свае лепшыя песні. Пасля заканчэння такога насычанага дня мы, задаволеныя, раз’ехаліся па сваіх гарадах і вёсках.

- Мне, няглзедзячы на тое, што я не ўдзельнік конкурсу, а студэнт Інстытута, было вельмі цікава ўсе гэтыя тры дні, - сказаў Дзіма Данілевіч, студэнт 1-га курса Інстытута тэалогіі БДУ. - Яшчэ пасля таго, як скончыўся тэрмін прыёму падачы работ, мне прапанавалі праверыць некаторыя з іх. Гэта было вельмі адказна і ганарова. Усе тры дні падвядзення вынікаў конкурсу былі выдатнымі: пашырыў круг зносін, з некаторымі нават пасябраваў! А яшчэ вельмі спадабаўся настрой удзельнікаў, іх бацькоў і настаўнікаў! Гэтыя шчырыя ўсмешкі давалі нам сілы і стымул для далейшай працы!

Так, праца будзе працягвацца! Настаўнікі Інстытута тэалогіі далі дамашняе заданне, якое ў наступным годзе можа апынуцца тэмай конкурса.